I 2023/24-sesongen framfører Andsnes Keiserkonserten av Beethoven på tre kontinent, med New York Philharmonic under Jaap van Zweden og New World Symphony under Michael Tilson Thomas, på Japan-turné med NHK Symphony og Herbert Blomstedt, og i sesong-opningskonsertar med Belgian National Orchestra, på turnéar med Orchestre National des Pays de la Loire og Göteborgs Symfoniker, og med Thomas Søndergård som dirigent for London Symphony Orchestra (LSO). Seinare i sesongen møter Andsnes igjen LSO for å spela Mozarts pianokonsert nr. 22 under leiing av Nathalie Stutzmann, han framfører Rakhmaninovs tredje pianokonsert med Lahav Shani og Philadelphia Orchestra, medan Manfred Honeck dirigerer både Pittsburgh Symphony og DR Symforniorkestret, og Klaus Mäkelä leiar Orchestre de Paris. Pianisten legg òg ut på høgprofilerte solorecital-turnéar i Japan og Europa, før han saman med Dover Quartet spelar pianokvintettane til Brahms og Dohnányi på ein turné til fem nordamerikanske byar, blant anna i Kennedy Center og Carnegies Zankel Hall. I oktober 2023 lanserte han samlinga Leif Ove Andsnes: The Complete Warner Classics Edition 1990-2010, ein retrospektiv CD-boks med 36 album, mange av dei Gramophone-prisvinnarar.

Som første kunstnarlege partner i Mahler Chamber Orchestra (MCO) fullførte Andsnes nyleg Mozart Momentum 1785/86. I eit omfattande prosjekt over fleire sesongar utforska pianist og orkester dei mest kreative og banebrytande periodane til Mozart. Andsnes leia ensemblet frå pianokrakken i Mozarts pianokonsertar nr. 20–24 ved BBC Proms i London og på andre sentrale scenar i Europa, og spelte inn verka for Sony Classical. Prosjektet sitt første album, MM/1785, blei nominert til 2022 International Classical Music Award, og tildelt den prestisjetunge franske Diapason d’or de l’année for beste konsertalbum i 2021. Gramophone kåra det andre albumet, MM/1786, til årets beste klassiske album i 2022, mens del to i serien fekk magasinet sin 2022 Special Achievement-pris. Mozart Momentum 1785/86 var Andsnes sitt andre samarbeidsprosjekt med MCO, etter suksessen med The Beethoven Journey. Gjennom fire sesongar gjekk Andsnes i djupna av Beethoven sin musikk for piano og orkester, på turnear til 108 byar i 27 land med meir enn 230 konsertar. Han leia MCO frå pianokrakken i Beethoven-pianokonsertsyklusar i Bonn, Hamburg, Lucerne, Wien, Paris, New York, Shanghai, Tokyo, Bodø og London, og samarbeidde med leiande internasjonale orkester som Los Angeles Philharmonic, San Francisco Symphony, London Philharmonic og Münchner Philharmoniker. Prosjektet blei foreviga i dokumentaren Concerto – A Beethoven Journey (2016), og er utgitt i Sony Classical-serien The Beethoven Journey. Den første delen av prosjektet blei kåra til iTunes’ beste instrumentalalbum i 2012, og vann den belgiske Prix Caecilia. Den andre delen blei i 2015 heidra med BBC Music sin høgthengande pris for årets beste utgiving, og den samla serien kom på New York Times si liste «Best of 2014».

Andsnes har gitt ut meir enn 50 album – soloverk, kammermusikk og pianokonsertar, mange av dei bestseljarar – med repertoar som spenner frå barokken til samtidsmusikk. Han har vore nominert til elleve Grammy-prisar, og blant dei mange internasjonale utmerkingane hans er sju Gramophone-prisar. EMI Classics-innspelingane av musikken til Edvard Grieg har fått strålande kritikkar. New York Times kåra Andsnes si 2004-innspeling av Grieg sin pianokonsert med Mariss Jansons og Berlinfilharmonien til årets beste CD, Penguin Guide gav innspelinga den høgthengande Rosette-prisen, og både det albumet og innspelinga med Grieg sine lyriske stykke vann Gramophone-prisar. Innspelinga hans av Mozarts pianokonsert nr. 9 og 18 blei òg kåra til årets beste i New York Times, og fekk Penguin Guides Rosette-pris. Han fekk nok ein Gramophone-pris for Rakhmaninovs 1. og 2. pianokonsert med Antonio Pappano og Berlinfilharmonien. Ein serie innspelingar der Schubert sine seine sonatar blei sett saman med Ian Bostridge som song lieder fekk ei overveldande mottaking. Det fekk òg Andsnes sine verdspremiere-innspelingar av Marc-André Dalbavies pianokonsert og Bent Sørensens The Shadows of Silence, begge komponert til han. I tillegg til The Beethoven Journeyog MM 1785/86 omfattar dei nyaste innspelingane hans Dvořáks urettvist gløymde pianosyklus Poetic Tone Pictures, Chopin: Ballades & Nocturnes og Billboard-bestseljaren Sibelius, alle spelt inn på Sony Classical, Stravinsky: The Rite of Spring & other works for two pianos four hands, spelt inn med Marc-André Hamelin på Hyperion, og Schumann: Liederkreis & Kernerlieder, spelt inn med Matthias Goerne for Harmonia Mundi. Samarbeida med både Hamelin og Goerne blei nominert til Grammy-prisar.

Andsnes er utnemnd til Kommandør av St. Olavs Orden, og han blei Årets Peer Gynt i 2007. Heidersprisen går til ein person eller ein institusjon som har markert seg på ein positiv måte og gjort Noreg sitt namn kjent i utlandet. Stortingsrepresentantane avgjer i skriftleg avstemming kven som blir Årets Peer Gynt. I 2004/05 blei han den yngste musikaren, og den første skandinaven, som kuraterte «Perspectives»-serien i Carnegie Hall. Han er òg blitt presentert i London Symphony Orchestra sin artistportrett-serie. I 2010/11 var han pianist-in-residence ved Berlinfilharmonien, i 2017/18 artist-in-residence ved New York Philharmonic og i 2019/20 artist-in-residence i Göteborgs Symfoniker. Etter at han hadde mottatt både Royal Philharmonic Society sin instrumentalistpris og Gilmore Artist Award, utropte Vanity Fair i 2005 Andsnes til ein av «dei beste av dei beste».

Leif Ove Andsnes blei fødd på Karmøy i 1970, og studerte ved Bergen Musikkonservatorium med den kjente tsjekkiske professoren Jirí Hlinka. Han har òg fått uvurderleg rettleiing frå den belgiske pianolæraren Jacques de Tiège, som til liks med Hlinka har hatt stor innverknad både på Andsnes sin spelestil og på dei musikalske tolkingane hans.
Andsnes bur i Bergen med sambuar og deira tre barn. Han er kunstnarleg rådgivar ved Prof. Jirí Hlinka Klaverakademi, der han kvart år held ein meisterklasse for deltakarane.

www.andsnes.com

www.facebook.com/LeifOveAndsnes

twitter.com/LeifOveAndsnes